Tàm dơ̆ tìp, Phó Củ tịc Quốk hội đơs nền lơgar Việt Nam sùm sền kwơ mờ kơ̆p kờñ tơnguh bơta git gơ̆p lơh broă bal uă gah broă mờ lơgar Hungary, là lơgar tam klăc bal tơl ală bơta sơnrờp ngan mờ là mìng dùl lơgar lơm tŭ do bơh lơgar Việt Nam dê tàm tiah tàm gùl đah măt tơngai lik câu Âu dê.

Phó Củ tịc Quốk hội kơ̆p kờñ bàr gah pơn jăt tai tơnguh broă tìp bal mờ pơgơl mpồl ală kấp, tàm hơ̆ uă ngan là kấp dờng, tàm jơh ală gah Đảng, Cíñ phủ, Quốk hội mờ tìp bal làng bol nàng lơh ngan mờ tơnguh rơlao tai nùs nhơm pin dờn cíñ trị mờ git wă bal, lơh tơngu me tờm nàng pờ ơnàng lơh broă bal đah bàr lơgar tàm ală gah broă. Củ tịc Quốk hội lơgar Hungary đơs nền, lơgar Việt Nam là lơgar tam klăc bal lài ngan lơgar Hungary dê tàm tiah đah jum măt tơngai lik câu Á dê. Quốk hội lơgar Hungary sùm lơh ngan gơs dùl lơgar kwơ màng tàm bơta git gơ̆p lơh broă bal đah bàr lơgar dê.