Phó Củ tịc Duh broă sùm Quốk hội ồng Trần Thanh Mẫn bal mờ kwang đơng lam ală ƀộ, gah lơh broă Dà lơgar, bal mờ ờ uă càr đah jum tàm gùl lơgar mờ Tây Nguyên, kwang đơng lam càr Khánh Hoà mờ mờr 1 rơbô nă kwang bàng, làng bol kis tàm ƀòn dờng do neh tus bal.

Tàm pơrjum tơnkah, Kwang geh jơng tàm Ƀộ Cíñ trị, Phó Củ tịc Duh broă sùm Quốk hội ồng Trần Thanh Mẫn neh jào Gai lòng lơh broă Khà 3 bơh Củ tịc lơgar jào pà Đảng ƀộ, gơnoar atbồ bal mờ làng bol ƀòn dờng Nha Trang in. Đơs tàm Pơrjum tơnkah, Phó Thủ tướng ồng Trần Hồng Hà sồr ƀòn dờng Nha Trang, càr Khánh Hoà lam lài tàm broă tam gơl sồ, lơh geh dùl tiah drà ngăc ngar, lơh geh gơnoar atbồ sồ, tơnguh niam tiah bơcri priă kă bro, gàr niam rài kis lơh broă sa mpồl bơtiàn, lơngăp lơngai mờ pràn kơl dang làng bol in.