Ala măt Ủy ƀan Thường vụ Quốk hội, Phó Củ tịc Thường trực Quốk hội ồng Trần Thanh Mẫn pơyoa tus kwang đơng lam càr Hậu Giang, kơnhoàl Châu Thành A, xã Thạnh Xuân mờ ală hìu nhă geh sră dong kờl bơh dà lơgar, cau rơƀah, kông ñân, cau lơh broă gơtìp kal ke tàm kơnhoàl Châu Thành A, càr Hậu Giang jơnau còp să đềt mềr mờ jơnau chờ gờm niam bơnĕ ngan.

Phó Củ tịc Thường trực Quốk hội sồr tơnkah càr Hậu Giang pơn jăt tai sền gròi tơnguh uă rài kis phan bơna, nùs nhơm ai ală hìu nhă geh sră dong kờl bơh dà lơgar, hìu rơƀah, cau lơh broă geh rài kis gơtìp kal ke, bơto sồr làng bol tam gơl phan tam, phan ròng jăt broă lơh sa kloh, rơhời bơ̆t bơtàu khà măt kă bro phan geh lơh bơh broă lơh sa suơn sre kloh, bơsong bơta kă bro phan geh lơh ai làng bol in; tơnguh uă bơta ngăc ngar bơsram sră ai oh kòn hìu nhă geh sră dong kờl bơh dà lơgar, hìu rơƀah in.