Tàm dơ̆ tìp, Mpồl Kwang bàng Quốk hội càr Hậu Giang neh yal jơnau kờp dŭ broă Pơrjum dơ̆ pram, Quốk hội khoă XV; tơnguh me hơ jơnau lùp, jơnau dan bơh cau tĕ khà dê. Tơnơ̆ mờ hơ̆, geh uă cau tĕ khà đơs jơnau kờñ pơyoa nùs nhơm, jơnau kơ̆p kờñ, ală broă ờ sŭk tàm kơnhoàl do dê tus mờ kwang bàng Quốk hội.

Đơs tàm dơ̆ tìp, Phó Củ tịc Thường trựk Quốk hội ồng Trần Thanh Mẫn tơlik nùs nhơm chờ hờp tŭ càr Hậu Giang geh broă tơnguh bơtàu niam tàm quý I nam do, tŭ gơguh lơh sa geh 12,67%, lam lài gùt lơgar dê. Tàm tơngai tus, Phó Củ tịc Thường trựk Quốk hội ồng Trần Thanh Mẫn sồr càr Hậu Giang tus bal lơh jăt Nghị quyết Pơrjum dờng dơ̆ XIII bơh Đảng dê, Nghị quyết Pơrjum dờng Đảng ƀộ càr Hậu Giang dơ̆ XIV; pal sền gròi, bơto bơtê, tơnguh bơtàu cau lơh broă nàng drơng ai broă tơnguh bơtàu càr in; bơ̆t bơtàu mpồl cíñ trị kloh niam, pràn kơl dang, di pal mờ broă kờñ kơnòl tàm bơta pa dê.