VOV4.K’ho - Mờ rơlao 10 nam tus bal broă lơh mpồl, lŏ Nông Thị Lành-Phó kwang atbồ mpồl cau ùr ƀòn Ograng (xã Ia Pếch, kơnhoàl Ia Grai, càr Gia Lai) neh geh uă broă pơgồp bal ai ală broă lơh tàm ƀòn lơgar in. Tàm hơ̆ uă ngan là mờ nùs nhơm tam pà jơnau kờñ gơboh bal, lŏ neh pơgồp bal mờ làng bol kis tàm do, tus bal dong kờl ală hìu rơƀah, hìu geh rài kis gơtìp kal ke.

    Lŏ Nông Thị Lành (soh ào jù) tus còp mờ pơn dờm pơn điang lŏ Tạ Thị Hồng Hạnh geh rài kis gơtìp kal ke

Kòp Kovid-19 gơtìp tàm ƀòn Ograng lơh uă hìu nhă gơtìp kal ke tŭ do sơlơ gơtìp kal ke rơlao. Mò Phạm Thị Lam là dùl tàm ală cau geh bal bơta kal ke tŭ hìu nhă geh cau pal tam cah is nàng sơndră mờ kòp gơtờp, roh priă geh mờ roh tai ală khà priă tă ndai. Mò Lam yal, tàm tŭ gơtìp kal ke, hìu nhă neh dờp geh broă dong kờl di tŭ bơh lŏ Nông Thị Lành: “Bơklao añ gơtìp kòp, kòn lòt lơh broă ngài rê cau sồr lòt tam cah is den añ glar ngan, tàm hìu neh ờ geh phan sa bloh, mờ gam pal tă tai 1 tơlăk 600 rơbô đong. Den tàng añ neh đơs mờ kòn là yal mờ ală wa hơ̆ là tŭ lơi kòn jơh tam cah is den hơ̆ sồng mè geh priă. Den tàng kơnờm mờ mlŏ Lành dong kờl den tàng neh tă geh priă dong kờl hìu nhă”.

          Lŏ Lành hòi jà ală cau geh nùs nhơm niam geh ală phan pà làng bol gơtìp tam cah is tàm ƀòn

Ờ mìng dong kờl ală cau tàm mpồl cau ùr tàm ƀòn Orang, lŏ Nông Thị Lành gam bal mờ ờ uă oh mi cau ùr tàm mpồl đơng lam gam pờ ơnàng broă dong kờl ală oh mi cau ùr gơtìp kal ke tàm ală ƀòn rềp bal in sơl. Tàm khà hơ̆ geh hìu nhă lŏ Tạ Thị Hồng Hạnh, kis tàm ƀòn Sát Tâu, xã Ia Pếch. Sơn đàc hìu rơƀah bơh lŏ Hạnh dê, mờ bơklao gam gơtìp kòp jroă tai, lŏ Nông Thị Lành neh hòi jà ală cau tă priă dong kờl rơlao 4 tơlăk đong nàng dong kờl lŏ Hạnh geh priă drơng tàm rài kis. Tŭ bơklao chơ̆t tài kòp jroă, lŏ Lành neh tus dong kờl broă ies, sùm tus còp să, pơn dờm pơn diang lŏ Hạnh sơrlèt mờ ală kal ke: “Ală tŭ kal ke bi Lành kung pà ƀung mi, ờ uă bơta phan mờ pơn dờm pơn diang, tàm xã geh broă lơh lơi bi kung ai lài, hòi jà tàm ƀòn tă phan nàng dong kờl bè ào, mpha, ƀung mi, phe. Bi Lành dong kờl kung uă, ưn ngài bi uă ngan tài ală tŭ gơtìp kal ke den mpồl cau ùr mờ xã kung tus còp să”.

Gam đì hờ đang rơndeh Honda neh klar, lŏ Nông Thị Lành lòt gùt tiah nàng dong kờl ală kơnòm dềt, cau kra geh rài kis gơtìp kal ke. Bơdìh mờ nùs nhơm đềt mềr, jơh nùs tàm broă lơh, ờ hoan geh cau git lŏ Nông Thị Lành kung gam pal sơm kòp jroă, mờ uă dơ̆ neh xạ trị. Bŭ lah tàm să gơtìp uă bơta kòp tê jê să, mơya lŏ Lành sùm chờ hờp, dong kờl ală cau gam gơtìp kal ke. “Mìng kơ̆p kờñ ală cau sùm kờñ bal mờ broă lơh añ dê. Dùl ngai lơi hơ̆ kơ̆p kờñ kòp gơtờp geh jơh nàng làng bol rê kis wơl mờ bơta lơngăp lơngai. Añ mìng kơ̆p kờñ lơh bè lơi nàng să jan pràn kơl dang, kơ̆p kờñ jơh ală cau geh pràn kơl dang, kơ̆p kờñ geh ală cau geh nùs nhơm niam sùm dong kờl ai broă lơh añ dê pah tŭ añ hòi jà nàng pà ală cau gơtìp kal ke in, nàng lơh ngan dong kờl nàng geh priă dong kờl làng bol in”.

Jăt UɃÑZ xã Ia Pếch yal, tàm nam 2021, lŏ Nông Thị Lành neh pơgồp bal mờ ală gah, mpồl lơh broă nàng pà git nđờ rơhiang pò phan tàm hơ̆ geh ală bơta phan ngui sa, sră măi, sră cih pà ală hìu nhă, ală kơnòm bơsram tàm xã gơtìp kal ke, kơnòm dềt kòn đời... Mò Phạm Thị Kim Tuyến, Phó Củ tịc UɃÑZ xã Ia Pếch đơs: Lŏ Nông Thị Lành là dùl nă kwang bàng jăk chài tơl ală bơta. Bơta geh pơnrơ ngan bơh lŏ Lành dê là jơh nùs mờ broă lơh, đềt mềr mờ ƀòn lơgar. “Mờ kơnòm bơh să tờm dê tàm ƀòn, bơdìh mờ broă lam sồr, dong kờl anih cit sơnơm, gŏ broă tam cah is bơh làng bol gơtìp kal ke bi hơ̆ ndrờm tus hòi jà. Bè đah xã geh đơs niam ngan, geh uă broă pơn jờng, lam sồr gơwèt mờ bi Nông Thị Lành. Mìng is gơwèt mờ bi Nông Thị Lành kung là cau lam lài nàng lam sồr ai ală cau in gŏ nùs nhơm geh kơnòl bơh làng bol tàm broă rơcang sơndră mờ kòp gơtờp, tàm hơ̆ uă ngan là tàm broă lơh nùs nhơm dong kờl is, dong kờl gơnoar atbồ xã, dong kờl ală gah, mpồl lơh broă, lam lài tàm broă lơh. Bi hơ̆ tus bal pràn, geh kơnòl mờ jơh nùs mờ geh uă gah, mpồl lơh broă sồr geh pơn jờng”.

Mờ ală cồng nha neh lơh geh, uă nam do, lŏ Nông Thị Lành neh geh ală kấp, gơnoar atbồ bal mờ mpồl lơh broă pà uă ngan sră jờng rơ. Mờ nùs nhơm chờ hờp, đềt mềr mờ kwơ màng ngan là tàm gơboh bal, sơnđàc bal, tam pà bal, dong kờl bal mờ ală cau, den tàng lŏ Nông Thị Lành sùm geh ală cau kờñ gơboh.

Cau cih Hoàng Qui-Cau mblàng Ndong Brawl