VOV4.K’ho- Tài gơrềng bơh mìu càl rbŭt dờng sồ 4 dê, bơh mang ngai 27 tus ngai 28/09, tiah Quảng Trị, Thừa Thiên- Huế, Đà Nẵng, Quảng Nam, Quảng Ngãi, Kon Tum geh mìu dờng ngan mờ dà mìu geh uă bơh 250 tus 350 milimet, geh tiah rlau 450 milimet. Tiah Quảng Bình, Bình Định mờ Gia Lai geh mìu dờng tus dờng ngan mờ dà mìu geh uă bơh 100 tus 200 milimet, geh tiah rlau 300 milimet.

Tus àng drim gờñ ngai 28/09, mìu càl rbŭt dờng neh tus tàm ù gờl lơh gơlik càl khồm pràn ngan tàm jơh ală tiah Quảng Trị, Đà Nẵng, Quảng Nam, Quảng Ngãi, Bình Định, Phú Yên, Kon Tum mờ Gia Lai, tơnơ̆ hơ̆ mìu càl rbŭt dờng lòt tus tiah đah jum lơgar Lào mờ rơhời ờ pràn gơ gơs mìu nhàc tiah duh sùh iò. Tàm dơ̆ pơrjum Mpồl đơng lam ƀòn lơgar sơndră wơl mìu càl rbŭt dờng sồ 4 mang ngai 27/09, Phó Thủ tướng ồng Lê Văn Thành tơngkah, mìu càl rbŭt dờng pràn ngan mờ bơta pràn càl khồm gơguh tus bơh 13 tus 14, càl gơ pồt pràn tus kâp 17 geh bal mìu dờng.

Den tàng bè hơ̆, pal tơrgùm uă ngan rlau jơh, hòi tơrgùm uă ngan rlau jơh jơh ală mpồl cau, geh bal ală anih lơh broă cíñ trị bơh dà lơgar tus ƀòn lơgar lam lơh ală broă lơh nàng tus dong kờl làng bol. Sơndră wơl mờ mìu càl rbŭt dờng sồ 4 jăt tàm nùs nhơm sơrbac mhar mờ sơrbac mhar rlau tai, jơh ală tài bơh màng kis, phan bơna jơtài làng bol dê, ơn màng kis làng bol dê hơđang rlau jơh, ờ gŏ di lời làng bol tài bơh dong kờl phan bơna jơtài mờ lơh gơrềng tus màng kis.

Cau cih VOV Tây Nguyên- Cau mblàng Lơ Mu K’Yến