VOV4.K’ho- Mho ngai 25/09, Phó Thủ tướng Cíñ phủ ồng Lê Văn Thành neh đơng lam dơ̆ pơrjum pờ tơlik tơn tàm internet lam lơh broă lơh rcang sơndră mờ càl rbŭt dờng Noru. Jat ồng Trần Hồng Thái, Kwang atbồ Tổng kụk Yal tơngĭt lài trồ tiah dà ia, mìu càl rơbŭt dờng Noru gam mŭt tàm Dà lềng tiah đah mat tơngai lik mờ geh gơ gơs là mìu càl rơ bŭt dờng sồ 4 tàm nam do dê. Do là mìu càl rơbŭt dờng pràn ngan rlau jơh tàm pơgap 20 nam rềp ndo gơrềng tus tiah tàm gùl lơgar dà lơgar.

Phó thủ tướng ồng Lê Văn Thành đơng lam rcang sơndră mìu càl rbŭt dờng Noru

Đơs tàm dơ̆ pơrjum, Phó Thủ tướng Cíñ phủ ồng Lê Văn Thành sồr ală ƀộ, ngàñ, ală tiah pal rcang lài lam lơh jat broă ntrờn làng bol, hòi jà ơhò, plung rê tàm tiah lơngap lơngai mờ nùs nhơm bañ sền ờ sơ̆p mờ ờ rcang sền ngăc. Ƀộ Quôk phòng, Ƀộ Giao thông Vận tải pơgồp bal mờ ală tiah kờp sền, sền gròi mờ jun ơhò plung gam tàm dà lềng rê tàm tiah ơm niam lơngap lơngai, mơkung gàr niam bơta lơngap lơngai ai làng bol in, pleh lời gơlik geh bơta ơhò rê ơm tàm tiah ơm lơngap lơngai kung gơtìp hoàc huơr.

Ơm tàm tiah đah tô Tây Nguyên dê, Kon Tum geh đơs lài geh kong gơ rềng pràn ngan bơh càl rbut dờng Noru dê. Nàng rơcang lài sơndră mờ gơ rềng bơh càl rbut dờng dê, Ủy ƀan Ñân zâ càr Kon Tum neh geh sră nggal pơyua sồr gơnoar atbồ ală tiah, gah lơh broă geh gơnoar mờ mpồl đơng pơlam ai ngui tơnau bơtơt rbòng dà hìu măi pờ tơlik òó đèng tơrgùm rơcang sơndră.Jat hơ̆, Củ tịc Ủy ƀan Ñân zân càr Kon Tum ồng Lê Ngọc Tuấn sồr Ủy ƀan Ñân zân ală kơnhoàl, ƀòn dờng mờ ală sở, gah broă lơh geh gơnoar lam lơh broă lơh rơcang sơndră mờ càl rbut dờng jat jơnau đơs “4 tơn tàm 1 anih” dipal mờ broă gơlik geh bơh càl rbut dờng, broă gơlik geh ngan ngồn tàm càr mờ yal jơnau, tơngkah lài di tŭ làng bol in nàng rơcang lài sơndră. Ală kơnhoàl, ƀòn dờng ai cau lơh broă lam lài lòt sền, kờp sền ală ƀòn làng bol ơm kis kềng gah dà dờng, dà croh, tơnau dơng dà, tiah lơyah, tiah thòng, geh jơnau pơhìn gơlik geh ngơr bam, dà kŏ dà cò, tơrlah ù nàng rơcang lài lam lơh ntrờn làng bol tŭ geh bơta ờ niam gơlik geh.

Cau mblàng K’Hạnh mờ K’ Duẩn