Tàm càr Hậu Giang, Phó Thủ tướng Cíñ phủ ồng Trần Hồng Hà bal mờ mpồl kwang bàng lơh broă bơh Cíñ phủ geh dơ̆ lơh broă mờ ală ƀộ, gah lơh broă dà lơgar bal mờ ală càr, ƀòn dờng tàm tiah ring dà dờng Cửu Long bè phan drơng tàm ală broă lơh gùng geh kwơ tàm tiah do.

Jăt Ƀộ Giao thông Vận tải yal, tŭ do, tàm tiah ring dà dờng Cửu Long gam bơcri priă lơh 8 rơndăp broă lơh gùng ntoăt jờl mờ 5 rơndăp broă lơh niam wơl, rề ơnàng, lơh pa ală gơl gùng bal mờ rơbàng tàm ală gơl gùng mờ kờp jơh khà priă bơcri di pơgăp 112 rơbô 600 tơmàn đong. Bơh tŭ do tus nam 2025, broă kờñ geh bràs ai ală rơndăp broă lơh gùng ntoăt jờl tàm tiah ring dà dờng Cửu Long là uă ngan, geh di pơgăp rơlao 50 tơlăk khối. Jơnau đơs pơn dŭt tàm dơ̆ lơh broă, Phó Thủ tướng Cíñ phủ ồng Trần Hồng Hà pà git, jăt jơnau kờp, jơnau kơlôi sơnơng den khà phan kung gam tơl jăt mờ jơnau kờñ lơh tàm ală rơndăp broă lơh gùng, pal kah ngan geh tai phan là ù tàm càr Long An, mơya Ƀộ Giao thông Vận tải pal gờñ geh jơnau sền bè kỹ thuật bơh ù do dê. Gơwèt mờ ală càr, ƀòn dờng tàm tiah ring dà dờng Cửu Long, Phó Thủ tướng Cíñ phủ sồr rơcang tơnguh 50% bơta pràn ală tiah lơh bràs tŭ do gam lơh broă.