Tàm dơ̆ wă rò, Phó Thủ tướng ồng Trần Lưu Quang tơlik nùs nhơm chờ hờp Gĭt gơ̆p tam klăc lơh broă bal jŏ jòng đah Việt Nam mờ Australia ngai sơlơ bơtàu tơnguh pràn kơldang, gơ lòt mŭt ngan ngồn tàm uă broă, kwơmàng kă bro đah 2 lơgar dê gơguh pràn, geh 16 tơmàn 100 tơlak dolar Mỹ tàm nam 2022, gơguh rlau 30 dơ̆ pơndrờm mờ nam 2021, ai lơgar Australia gơ gơs là lơgar tam klăc lơh broă bal kă bro dờng dơ̆ 10 bơh lơgar Việt Nam dê mờ Việt Nam là lơgar tam klăc lơh broă bal kă bro dờng dơ̆ 7 bơh lơgar Australia dê. Thủ tướng sồr bàr gah pơgồp bal niam nàng bơyai lơh niam ală broă lơh tơngkah kir sơnrai 50 nam lơh bơta gĭt gơ̆p cribơyai broă mờ lơgar ndai đah Việt Nam mờ Australia tàm nam 2023, tàm hơ̆ geh broă rơcăng wil tơl ai ală broă lơh tàm pơgơl mpồl kwang bàng lòt còp bal mờ gơ̆p đah 2 lơgar tàm tơngai tus. Jăt tàm bơta gĭt gơ̆p 2 gah niam bơnĕ, bàr nă kwang đơng lam bồ đơs sùm bơta kwơmàng bơh broă gàr niam ring lơngai, kơ̆ kơl jăp, lơh broă bal tàm tiah do mờ tàm dunia; ki ngàm Sơnoa boh lam Liên hợp quôk mờ adat boh lam dunia.