Tàm pơrjum hòi jà bơcri priă dơ̆ do, càr Bến Tre hòi jà geh 32 rơndăp broă bơcri priă tàm ală gah broă: lơh sa mờ măi mok, bơ̆t bơtàu mờ kă bro phan bơna ală tiah, mpồl lơh sa mờ măi mok, xăng jờu, nhơm chu, lòt nhơl, lơh sa suơn sre-ƀòn lơgar, tiah kis, anih ơhò ơm, tiah drà, ƀòn ơm kis.

Đơs tàm pơrjum, Phó Thủ tướng Duh broă sùm Cíñ phủ ồng Nguyễn Hoà Bình đơs niam ală broă lơh ngan bơh Đảng ƀộ, gơnoar atbồ càr dê tàm broă hòi jà bơcri priă tàm tơngai do. Jăt Phó Thủ tướng đơs tàm tơngai tus, càr Bến Tre pal lơh jăt gùng dà broă lơh, adăt boh lam bơh Đảng mờ Dà lơgar; pơgồp bal mờ broă lơh jăt ală Jơnau lơh nền bơh Dà lơgar, Đảng ƀộ càr dê; bơyai lơh geh cồng nha Rơndăp ù tiah, gàr ndrờm bal, di pal mờ rơndăp ù tiah bơh dà lơgar, rơndăp ù tiah gah broă. Hòi jà uă ngan mờ ai ngui geh cồng nha ală bơta pràn nàng bơcri priă bơtàu tơnguh lơh sa mpồl bơtiàn.