Tàm ƀlàng ơnàng mờr 11 lồ, hìu bơsram Hoàng Việt geh rcang phan bơna pa ngan, rlau 400 nă kwang bàng, cau pơgru mờ cau lơh broă hìu bơsram gam bơto bơtê, sền gròi pơgap 3 rơbô 400 nă kơnòm bơsram bơh kấp 1 tus kấp 3 tus bơh rlau 20 càr, ƀòn dờng tàm jơh gùt lơgar dê.

Đơs tàm dơ̆ lơh broă, Phó Thủ tướng jờng rơ uă ngan broă rơndăp lơh kwơ màng bơh càr Dăk Lăk dê tàm broă lơh jat gùng dà broă lơh bơh Đảng, Dà lơgar dê bè bơcri priă ai gah bơto bơtê in, kơ̆p kờñ kwang đơng lam bồ càr, gah bơto bơtê kung bè cau pơgru mờ kơnòm bơsram hìu bơsram Hoàng Việt pơn jat tai lơh jat ală cồng nha neh lơh geh, sùm tơnguh uă cồng nha bơto bơtê tơl làm ai kơnòm bơsram in. Di dơ̆ do, Phó Thủ tướng Duh broă sùm Cíñ phủ ồng Nguyễn Hòa Bình neh jàu phan lời kir sơnrai mờ phan trung thu pà kơnòm bơsram Hìu bơsram Hoàng Việt in. Lài hơ̆, mang ngai 14/09, Phó Thủ tướng ồng Nguyễn Hòa Bình neh tus bal broă lơh Trung thu “Đèng gŭ sòl àng bơta kơ̆p kờñ” tàm càr Dăk Lăk, jàu pà 1 rơbô 700 bơnah phan pà, geh: priă bơsram, rơndeh coh mờ phan trung thu ai ală kơnòm dềt geh rài kis kal ke in.