Tàm dơ̆ lơh broă, Phó Thủ tướng ồng Bùi Thanh Sơn neh iăt kwang đơng lam bồ càr Cao Bằng yal ing bè bơta hoàc huơr bơh rềs àr tài trồ tiah lơh aniai, tàm hơ̆ uă ngan là mìu càl rơbŭt dờng sồ 03.

Jăt mờ hơ̆, rềs àr bơh bồ nam tus tŭ do neh lơh càr Cao Bằng hoàc huơr rơlao 248 tơmàn đong, mìu is mìu càl rơbŭt dờng sồ 03 neh lơh 45 nă cau gơtìp chơ̆t, 15 nă cau sồt să mờ 08 nă cau gam jòi ờ gŏ ƀồc, mờr 1 rơbô 500 nơm hìu, rơlao 1 rơbô 600 lồ ù tam phan gơtìp aniai. Phó Thủ tướng, Ƀộ trưởng Ƀộ Cri bơyai broă mờ lơgar ndai ồng Bùi Thanh Sơn sồr càr Cao Bằng pơn jăt tai jal mhar jòi cau gơtìp ờ gŏ ƀồc tài bơh trồ tiah lơh aniai; mờ mhar bơsong bơta hoàc huơr bơh trồ tiah, tàm hơ̆ uă ngan là bơta koh gơl is tài tơrlah gùng lòt tŭ do. Càr pal lơh ngan broă dong kờl phan sa, phan ngui, dà sàng, phan ngui ai làng bol tàm tiah gơtìp tơrlah ù mờ làng bol tàm tiah gơtìp koh gơl kơrian is.