Phó Thủ tướng jờng rơ uă ngan broă bơta gĭt gơ̆p lơh sa- kă bro đah lơgar Việt Nam mờ Mỹ gàr niam tàm khà gơguh niam ngan tơnơ̆ tŭ 2 gah tơnguh tai bơta gĭt gơ̆p lơh broă bal kwơ màng tơl làm. Priă lơh geh kă bro đah 2 lơgar dê tàm 4 nhai bồ nam 2024 geh 38 tơmàn 600 tơlak dolar Mỹ, jat hơ̆, lơgar Mỹ pơn jat tai là drà tăc phan mờ lơgar ndai dờng ngan rlau jơh lơgar Việt Nam dê tàm ală nhai bồ nam 2024 do.

Phó Thủ tướng đơs sùm: tàm tơngume bơta gĭt gơ̆p pa neh pờ geh ù tiah niam nàng sơlơ tơnguh tai lơh broă bal tàm ală gah broă bè lơngăp lơngai internet mờ ală măi mok pa pơn rơ, tàm jàu ală măi mok tờm, bơt bơtàu tăc bro bơtàu tơnguh bán zẫn mờ lơh sa mờ măi mok điện tử, sơlơ tơnguh tai pơnđơl pràn lơh ngan bơsong jơnau gơ lời wơl bơh rài tam lơh dê.