Bơh broă tus sền tàm ală tiah gơtìp tơrlah jal mhar tàm 5 càr gơwèt tiah Ring dà dờng Cửu Long kung bè tàm ờ uă tiah gơtìp tơrlah tàm tiah Đah tô măt tơngai mŭt dà lơgar mờ ờ uă tiah gơtìp tơrlah tàm Tây Nguyên, pà gŏ jơnau kờñ pal bơsong jal mhar ală tiah gơtìp tơrlah in.

Phó Thủ tướng ồng Lê Minh Khái đơs uă tus mờ 13 tiah gơtìp tơrlah tàm tiah Ring dà dờng Cửu Long mờ ală ƀộ, gah lơh broă dà lơgar neh geh jơnau đơs di tŭ nàng bơsong bơta hoàc huơr bơh tơrlah ù jăt gah dà dờng, jăt gah dà lềng bơh tam gơl trồ tiah dê, lơh ờ niam tus mờ broă lơh sa mpồl bơtiàn. Phó Thủ tướng ồng Lê Minh Khái đơs tờm: Mờ bơta jal mhar bơh broă bơsong tàm tiah gơtìp tơrlah dê, ală càr, ƀòn dờng, ală gah, mpồl lơh broă dà lơgar pal mhar sền wơl jơh, pơgồp bal, ai geh jơnau đơs tàm rơndăp broă bơsong broă gơtìp tơrlah jăt gah dà dờng tàm 13 càr, ƀòn dờng tiah Ring dà dờng Cửu Long mhar ngan, di tŭ, di pal mờ kơrnoăt tàm adăt boh lam dê, tàm bơta pal geh lơh tơrgùm bal, gờñ mŭt lơh.