VOV4.K’ho - Mho òr (28/07), tàm hìu lơh broă Cíñ phủ, Phó Thủ tướng ồng Lê Minh Khái đơng lam dơ̆ pơrjum sơnrờp ngan Mpồl đơng lam bè broă lơh jăt Broă lơh bơtàu tơnguh wơl mờ tơnguh bơtàu lơh sa mpồl bơtiàn.

Jăt jơnau yal bơh Ƀộ Kế hoạc mờ Đầu tư, tơnơ̆ rơlao 6 nhai lơh jăt Nghị quyết sồ 11 bơh Cíñ phủ, ală anih lơh broă neh lơh gơs dùl khà dờng broă lơh, di pal mờ jơnau kờñ bal mờ tơngai neh geh ai. Bè cồng nha bơcri priă, jăt khà kờp ing ờ hềt tơl, ală broă lơh gơwèt broă lơh do neh bơcri di pơgăp 48 rơbô tơmàn đong. Đơs tờm ală broă dong kờl tàm broă bơtàu tơnguh wơl mờ tơnguh bơtàu lơh sa mpồl bơtiàn gam geh lơh jăt nền nòn, geh ờ uă broă lơh geh khà bơcri priă uă tàm tơngai ờ jŏ, geh ờ uă broă lơh neh geh tam gơl niam rơlao. Mơya, geh ờ uă jơnau đơs kung đơs tus mờ broă lơh ờ uă sră nggal bơto sồr gam ờ hềt di pal mờ tơngai kờñ neh geh ai tàm Nghị quyết sồ 11 bơh Cíñ phủ dê. Sồr tàm tơngai tus pal geh yal, chồl pràn broă rơcang lài, mhar bơsong ală broă kal ke, gơkòl, gàr niam cồng nha bơh broă lơh do...

Cau mblàng Ndong Brawl