Jat jơnau yal, Kờp jơh khà priă ai bơcri dà lơgar bơh 5 càr, ƀòn dờng do dê tus jơh nhai 3 nam 2023 là rlau 2 rơbô 553 tơmàn đong, lơh geh 2,74% broă rơndap lơh lơyah rlau uă ngan pơndrờm mờ kờp bal bơh gùt lơgar dê. Mìng is ƀòn dờng Hồ Chí Minh ai priă bơcri dà lơgar dùl ết ngan rlau jơh, mìng geh 0,89%.

Đơs tàm dơ̆ pơrjum, Phó Thủ tướng ồng Lê Minh Khái sơñio loh: broă ai priă bơcri dà lơgar lơyài, gơ kòl dờng ngan priă bơcri Dà lơgar dê gơrềng uă ngan tus khà gơguh tai lơh sa mờ tơm priă bơh rài lơh sa dê, den tàng pal lơh loh kơnòl broă tàm tŭ lơyài ai priă bơcri dà lơgar, lơyài yal gùng dà broă lơh bơcri priă; Phó Thủ tướng sồr, ală Ƀộ, ngàñ, ală tiah tơrgùm đơng lam kràñ cê jơh nùs, dùl ròt bal, geh cồng nha ală kơnòl broă, broă lơh. Bal mờ hơ̆, pal sùm lòt sền, sồr lơh ngan, kờp sền tơl rơndap broă lơh loh làng nàng di tŭ bơsong ală bơta kal ke, kòl yan gơlik geh tàm bơta geh ngan.