VOV4.K’ho- Mho ngai 13/6, tàm Hìu lơh broă Cíñ phủ, Ƀí thư Đảng dà lơgar, Phó Thủ tướng ồng Lê Minh Khái, Kwang atbồ Mpồl đơng lam pơlam khà priă neh đơng lam pơrjum mờ ală ƀộ, gah broă lơh bè đơng pơlam khà priă 2, 3 bơta phan pal geh.

Phó Thủ tướng ồng Lê Minh Khái geh jơnau đơng lam tàm pơrjum

Đơs pơn dut pơrjum, Phó Thủ tướng ồng Lê Minh Khái đơs nền, tàm 5 nhai bồ nam, bơta kơn jơ̆ roh bơngă khà priă dờng ngan. Jơnau là tài bơh ală lơgar ngui broă lơh priă jền ờ huan lơh kràñ. Bơdìh hơ̆ tai, tơnơ̆ tŭ kòp Kovid-19 geh sền gròi, ală broă lơh lơh sa kă bro gơ rê bè ờs wơl, den tàng jơnau kờñ ngui phan gơguh uă ngan. Tàm bơta bè hơ̆, Cíñ phủ, Thủ tướng Cíñ phủ mờ ală ƀộ, gah broă lơh, ală càr, ƀòn dờng neh lam lơh uă broă lơh jơh nùs, geh cồng nha. Đơs lài tàm tơngai tus, bơta kơn jơ̆ roh bơngă khà priă gam dờng rlau tai. Ngan là khà priă xăng zờu geh pơn jat tai gơguh jơnhua lơh gơ rềng tus khà priă 2, 3 bơta broă drơng ala, phan bơna. Den tàng, broă lơh đơng pơlam khà priă bơh Cíñ phủ dê bơh tŭ do tus lồi nam kal ke ngan. Gơ wèt mờ broă atbồ khà priă 2, 3 bơta phan pal geh rềp mềr mờ rài kis làng bol, Phó Thủ tướng sồr ală ƀộ, gah broă lơh bơh tŭ do tus lồi nam, pal jat sền nền nòn broă gơlik geh bơh drà kă bro dê, sơlơ tơnguh rlau tai broă đơs lài gờñ, nàng geh broă lơh đơng pơlam ngac ngar, gàr niam broă lơh gơlik mờ jơnau kờñ phan bơna pal geh drơng broă lơh sa, ngui sa, lơh geh jơnau kờñ ai tơlik.

Cau mblàng K’Duẩn