Cri bơyai tàm pơrjum kwang bàng đơng lam ală Ƀộ, gah lơh broă dà lơgar đơs là, tàm ală nhai bồ nam bơta geh ală phan kă bro geh kwơ geh gàr niam, priă geh kơl jăp, gơlik geh di mờ jơnau đơng lam jă priă bơh Mpồl đơng lam neh geh ai. Phó Thủ tướng ồng Lê Minh Khái sồr, ală ƀộ, gah dà lơgar, ală càr, ƀòn dờng lơh geh cồng nha mờ ndrờm bal gơnoar tam pà, kơl jăp giă priă ală bơta phan dà lơgar atbồ.

Gàr tơl bơta phan kă bro geh ai, rơcang tơl phan nàng di tŭ mờ jơnau kờñ bơh làng bol dê, tàm hơ̆ uă ngan là phan sa, phan ngui, phan kă bro mờ broă lơh drơng ala ngui sa geh kwơ, tàm hơ̆ uă ngan là nàng drơng broă kờñ ngui sa tàm ală dơ̆ lơh chờ, satềp lồi nam. Ală càr, ƀòn dờng rơcang lơh jăt broă atbồ dà lơgar ală bơta phan di jăt mờ gơnoar, tơnguh broă tus sền, jăt sền lơh jăt ală broă kờp jă priă, lir jă giă priă; loh làng jơnau tơngit bè giă priă.