Tàm dơ̆ pơrjum, kwang đơng lam bồ ală Ƀộ, Gah broă lơh dà lơgar neh cribơyai mùl màl mờ ală mpồl tam klac, mpồl lơh sa kă bro bè 2 Thông tư do; đơs là, do là tŭ niam nàng Ngân hàng dà lơgar kung bè ală ƀộ, gah broă lơh dà lơgar iat jơnau đơs bơh drà kă bro, bơh mpồl lơh sa kă bro, sền sơ wì nền nòn ală bơta gơ rềng nàng “jòi geh ală bơta ring bal” mờ geh ală broă lơh dipal, ờ mìng dong mpồl lơh sa kă bro mờ gam gàr lơngăp lơngai ai ală ngân hàng in tai.

Đơs pơn dut dơ̆ pơrjum, Phó Thủ tướng ồng Lê Minh Khái đơs niam kwang ala mat ală ƀộ, gah broă lơh dà lơgar, mpồl lơh sa kă bro, mpồl tam klac neh geh bơta tàm bơsram bal, cribơyai song dơpă nàng lơh loh tơngume broă kờñ pal bơsong. Đơs sùm, Ngân hàng dà lơgar geh 2 gơnăp gơnoar kuơmàng ngan là đơng lam broă lơh priă jền, gàr niam gròi sền bơta roh giă priă, gàr kơ̆ kơljap lơh sa dờng, chồl pràn bơtàu tơnguh lơh sa. Dơ̆ 2 là gàr lơngăp lơngai ai ală ngân hàng in. Do là broă kal ke ngan, sồr pal geh bơta tàm pơgồp bal ală broă lơh ring bal, ngac ngar, geh cồng nha.