VOV4.K’ho- Tềng đăp broă gơlik geh tàm ală ngai rềp ndo, giă tăc bro bàr pe bơta phan tàm lơgar gơguh, tài bơh giă xăng zờu dunia gơguh, ngai 14/03 tàm Hìu duh broă Cíñ phủ dê, Ƀí thư Đảng Dà lơgar, Phó Thủ tướng Cíñ phủ ồng Lê Minh Khái đơng lam dơ̆ pơrjum mờ bàr pe ƀộ, gah sơnah lơh broă kâp dà lơgar mờ ală càr, ƀòn dờng bè broă lơh đơng lam giă bàr pe bơta phan kwơmàng, kờñ pal geh bè xăng zờu, phan ngui bơ̆t bơtàu, lŭ lòs, phơng sih, phan lơh geh bơh sươn sre, drơng broă ala phan ngui gah lơh sơnơm tơm ba.

Đơs tàm dơ̆ pơrjum, Phó Thủ tướng ồng Lê Minh Khái đơs nền, broă gròi sền kràñ ală bơta phan kong gơrềng bơh giă xăng zờu là kờñ ngan nàng di tŭ bơsong jơnau sơmờm tơnguh giă ờ dipal. Phó Thủ tướng đơs sùm, gơwèt mờ ală bơta phan dà lơgar lơh nền giă, tềng đăp măt tàm tơngai tŭ do ờ gŏ di sền swì tơnguh giă, ngan là ală drơng broă dà lơgar. Mìng is ală bơta phan dà lơgar ờ lơh nền giă, Phó Thủ tướng sồr gròi sền kràñ ală jơnau lơh gơs giă; sền swì nền ală jơnau geh tềl tơngŏ ờ bè ờs, ală bơta phan lơh gơrềng uă tus rài kis làng bol dê, ngan là cau rƀah. Lơh glài kràñ ală cau lơi prăp pồn phan nàng jòi sa kơñau ờ di mờ adat boh lam.

Cau mblàng Lơ Mu K’Yến