VOV4.K’ho - Phó Thủ tướng Cíñ phủ ồng Lê Minh Khái neh tus còp hìu lơh broă Mpồl kă bro dunia (WTO) tàm càr lơgar Geneva, lơgar Thụy Sỹ, mờ lơh broă mờ Phó Kwang atbồ mpồl WTO ồng Trương Hướng Thần.

Tàm dơ̆ lơh broă, Phó Thủ tướng ồng Lê Minh Khái đơs, lơgar Việt Nam sền kwơ gơnoar tờm bơh mpồl WTO dê tàm broă chồl pràn broă kă bro uă lơgar pờ, ndrờm bal, ai bơh tàm adăt boh lam, sơbì ală bơta kal ke tă dia, tam dră mờ nùs nhơm ờ niam dong kờl kă bro, kơ̆p kờñ mpồl WTO pơn jăt tai tơnguh gơnoar đơng lam nàng chồl pràn broă kă bro gùt plai ù jăt broă lơh tơrgùm bal, ndrờm bal, pơgồp bal tàm broă brồ guh wơl mờ tơnguh lơh sa. Tàm bơta cíñ trị mờ lơh sa dunia geh uă bơta kal ke, ồng Trương Hướng Thần kơ̆p kờñ lơgar Việt Nam pơn jăt tai pơgồp bal niam tàm broă cri bơyai tàm pơrjum Ƀộ trưởng mpồl WTO dơ̆ 12 tàm nhai prao tus nàng lơh geh ală cồng nha mùl màl, tàm hơ̆ uă ngan là tàm gah dong kờl phan tàm dà mờ lơh sa suơn sre, bơh tŭ hơ̆ geh pơgồp bal chồl pràn kă bro gùt plai ù.

Cau mblàng Ndong Brawl