VOV4.K’ho- Phó Thủ tướng ồng Lê Minh Khái (Kwang atbồ Mpồl lơh broă sồ 2 bơh Thủ tướng Cíñ phủ dê bè lơh pràn ai priă bơcri dà lơgar dê) pa đơng lam pơrjum nàng kờñ sồr ngan, tă bơsong bơta kal ke, kòl yan, lơh pràn broă ai priă bơcri dà lơgar nam 2022 gơwèt mờ 8 Ƀộ, Anih lơh broă dà lơgar mờ 4 tiah. Jat Ƀộ Kế hoạc mờ Đầu tư yal, kờp jơh broă rơndap lơh bơcri priă kes priă dà lơgar nam 2022 Thủ tướng Cíñ phủ jàu ai 8 Ƀộ, Anih lơh broă mờ 4 tiah in (gơwèt Mpồl lơh broă sồ 2) là rlau 24 rơbô 700 tơmàn đong. Tus jơh nhai 7 do, kờp dŭ kờp jơh priă ai bơh 12 mpồl lơh broă dê là 7 rơbô 400 tơmàn đong, lơh geh pơgap 30%.

Jat Phó Thủ tướng ồng Lê Minh Khái, ai priă bơcri dà lơgar lơyài tài geh uă jơnau gơbàn, mơya tam pà priă bơcri lơyài là tài jơnau gơbàn ờ gŏ rcang lài là tờm ngan. Sồr gah lơh broă ală tiah dê lơh mhar broă tam pà priă. Phó Thủ tướng sồr kwang đơng lam bồ ală Ƀộ, Anih lơh broă, ală tiah sền gròi kràñ cê jơh nùs ngan đơng lam, tă bơsong tơl bơta gơ kòl, bơta kal ke, sơlơ tơnguh bơnah roă mờ pal lơh ngan.

          Cau mblàng K’Hạnh