VOV4.K’ho - Drim òr (12/01), tàm Hà Nội, Thañ tra Cíñ phủ bơyai lơh tơn jơh broă lơh nam 2021 mờ lơh jăt kơnòl nam 2022. Ƀí thư Đảng dà lơgar, Phó Thủ tướng Cíñ phủ ồng Lê Minh Khái mờ Tổng Thañ tra Cíñ phủ ồng Đoàn Hồng Phong đơng lam bal pơrjum jăt broă lơh pờ tơlik tàm internet tàm ală anih pờ tàm gùt lơgar.

                              Phó Thủ tướng ồng Lê Minh Khái geh jơnau đơng lam tàm pơrjum

Đơs tàm pơrjum, Phó Thủ tướng ồng Lê Minh Khái sồr, tàm tơngai tus gah thañ tra pal pơn jăt tai lơh jăt mờ jơnau đơng lam bơh Mpồl đơng lam Dà lơgar bè rơcang sơndră mờ sa kuề sa koà, ai gùng dà broă lơh lùp sền nam 2022 neh geh Thủ tướng kĭ nàng lơh jăt. Tềng đăp măt pal lơh geh cồng nha bè rơndăp broă mờ gùng dà broă lơh bơh gah Thañ tra nam 2022 dê. Gah lơh broă do pal rơwah ală tơngu me, broă lơh neh geh mpồl bơtiàn sền gròi nàng lơh jăt, bơh tŭ hơ̆ nàng lơh niam wơl, di lah gŏ tìs geh bơsong nền nòn di jăt mờ kơrnoăt tàm adăt boh lam dê.

Cau mblàng Ndong Brawl