VOV4.K’ho - Đơs tàm Pơrjum bè ờs pah nam dơ̆ 52 Cri bơyai lơh sa dunia (geh bơyai lơh tàm Davos, lơgar Thụy Sỹ), Phó Thủ tướng Cíñ phủ ồng Lê Minh Khái đơs tờm tus mờ broă gơrềng bal tung lơtang “bàr” bơh kòp Kovid-19 mờ kal ke cíñ trị gam lơh gơlik ală bơta gơrềng ờ hềt tŭ lơi geh tus anih ai, khà priă mờ anih ai phan sa gùt plai ù.

                                                Phó Thủ tướng Cíñ phủ ồng Lê Minh Khái

Phó Thủ tướng đơs tus 5 jơnau kwơ màng, tàm hơ̆ geh broă tơnguh broă lơh bal dunia, nùs nhơm uă lơgar, chồl pràn gơnoar bơh mpồl lơh broă dunia nàng bơsong ală broă gơrềng tus broă geh tơl phan sa gùt plai ù, tàm hơ̆ pal geh tơl anih ai phan sa niam, sơbì bơta kal ke kă bro gơwèt mờ phan sa, dong kờl priă jền ai ală lơgar gam tơnguh bơtàu, chồl pràn broă lơh bal pe gah mờ lơgar Việt Nam lơh geh cồng nha mờ ală lơgar câu Phi mờ câu Mỹ La-tinh; tam gơl pa bồ tơngoh, bơceh lơh bơta pràn pa nàng chồl pràn broă tơnguh bơtàu bơh gah lơh sa suơn sre mờ lơh geh phan sa, tàm hơ̆ uă ngan là ngui broă lơh sa mờ măi mŏk dơ̆ 4.

Cau mblàng Ndong Brawl