Mho ngai 13/01, tàm Hìu lơh broă Cíñ phủ, Ƀí thư Đảng Dà lơgar, Phó Thủ tướng ồng Lê Minh Khái neh wă ồng Park Hark Kyu, Kwang atbồ dờng Tập đoàn Samsung Electronics drơng broă priă jền gam geh dơ̆ còp mờ lơh broă tàm lơgar he.

Tàm dơ̆ wă, Phó Thủ tướng ồng Lê Minh Khái đơs sùm bơta gĭt gơ̆p cribơyai broă mờ lơgar ndai đah Việt Nam mờ Hàn Quôk neh geh ală bơta bơtàu tơnguh uă mờ tŭ do gam tàm tơngai bơtàu tơnguh niam bơnĕ. Hàn Quôk neh gơ gơs lơgar lơh broă bal jŏ jòng bơh lơgar Việt Nam dê tàm jơh ală gah broă, ngan là lơh sa, kă bro mờ bơcri priă. Do kung là ală bơta ƀuơn nàng Samsung kung bè ală mpồl lơh sa kă bro lơgar Hàn Quôk dê pơn jat tai pờ ơnàng bơcri priă tàm Việt Nam tàm tơngai tus. Kwang atbồ dờng Samsung pà gĭt, să tờm ồng neh geh rlau 20 dơ̆ tus Việt Nam nàng jòi gĭt tiah lơh sa kă bro, tàm hơ̆ geh broă lơh nền bơcri priă lơh hìu măy Samsung tàm Thái Nguyên. Kwang atbồ dờng Samsung pà gĭt: Samsung kung neh hòi jà ală kông ty dềt lơh gơlik màn hìñ, phan crăp điện tử, pơn jat tai bơcri priă tàm Việt Nam tàm tơngai tus.