Jăt jơnau yal bơh Ƀộ Bơto bơtê mờ Bơsram, dơ̆ pơrlòng jơh bơsram kấp 3 nam 2024 geh bơyai lơh kung ndrờm bal mờ tơngai bơh nam 2020 tus 2024 dê sơl. Broă sền pơrlòng rơ̆p geh bơyai lơh tàm ală ngai 26, 27 mờ 28 nhai 06, broă ai khà pơrlòng geh lơh jăt broă rơndăp lơh neh geh ai bal bơh ngai 29 nhai 6 tus ngai 14 nhai 7, yal cồng nha pơrlòng tàm tŭ 8 jơ ngai 17 nhai 7 tàm Ƀộ Bơto bơtê mờ Bơdram mờ tàm 63 càr, ƀòn dờng. Kờp jơh khà cau tus pơrlòng dan cih măt pơrlòng là rơlao 1 tơlăk 71 rơbô nă, gơguh rơlao 45 rơbô nă pơn drờm mờ nam lài.

Mờ khà rơlao 1 tơlăk 71 rơbô nă cau pơrlòng tàm 63 càr, ƀòn dờng, rơ̆p geh di pơgăp 200 rơbô nă kwang bàng, cau pơgru bơh gah bơto mờ bơsram, mpồl kwang àng, ling klàng, gah lơh sơnơm, ồs đèng… geh ai tus bal tàm broă bơyai lơh pơrlòng. Phó Thủ tướng ồng Lê Thành Long sồr Ƀộ Bơto bơtê mờ Bơsram bal mờ ală Ƀộ, gah lơh broă pal pơgồp bal nền nòn nàng bal mờ ală càr, ƀòn dờng rơcang kơrian lài mờ ală bơta gơlik geh ni sơna, mờ ai tơl bơta ƀuơn ngan ală cau pơrlòng in tus pơrlòng.