VOV4.K’ho- Mho ngai 18/10, Phó Thủ tướng Cíñ phủ ồng Lê Văn Thành neh  lòt sền broă lơh bơsong jơnau gơ lời wơl tài bơh mìu càl rơbŭt dờng dà kŏ dà cò tàm càr Quảng Trị. Phó Thủ tướng neh tus sền, sồr lơh broă lơh bơsong jơnau ñcùn ù, tơrlah ù kơn jơ̆ ngan gơlik geh tàm Gùng rơndeh dờng 15D gùng lòt tus Mpồng tiah nhàr lơgar Dunia La Lay, gơl lòt gan xã A Ngo, kơnhoàl Đakrông.

Tơrlah gùng kơn jơ̆ ngan gơlik geh tàm gùngrơndeh dờng 15D lòt tus Mpồng tiah nhàr lơgar Dunia La Lay

Phó Thủ tướng ồng Lê Văn Thành neh sồr càr Quảng Trị mờ ală mpồl lơh broă geh gơrềng mhar lơh niam wơl, sơrbăc mhar lam lơh gơl gùng lòt ing, gờñ ai rơndeh lòt rê tàm gơl gùng tờm lòt tus Mpồng tiah nhàr lơgar Dunia La Lay. Phó Thủ tướng kung đơs loh, do là gùng lòt tus Mpồng tiah nhàr lơgar Dunia La Lay, rơndeh pơndiang phan kơnjơ̆ lòt gan, den tàng broă lơh gùng lòt ing halà bơ̆t wơl gơl gùng tờm kung pal lơh niam. Tŭ neh ai rơndeh lòt rê wơl den pal gàr niam bơta lơngap lơngai, bulah là gùng lòt ing kung bañ lơh gơ jă gơ jal ir, ờ gŏ di tài bơh bơta kơn jơ̆ bơh broă ai rơndeh lòt rê mờ lơh gùng lòt roh bơta lơngap lơngai gơlam tus ală broă rềs àr pơlai soh ngan.

VOV/K’Hạnh mblàng