VOV4.K’ho- Drim ngai 23/02, tàm càr Thái Bình, Phó Thủ tướng ồng Lê Văn Thành lam bồ mpồl lơh broă bơh Cíñ phủ dê neh tus sền broă lơh rơndăp broă lơh Ñiệt điện Thái Bình 2, kwơmàng là broă chu ồs dơ̆ sơnrờp mpồl măy sồ 1 bơh Hìu măy dê mờ geh dơ̆ lơh broă mờ kwang đơng lam bồ Tập đoàn Nhơm zờu dà lơgar Việt Nam (PVN), cau tờm bơcri priă lơh rơndăp broă lơh.

Phó Thủ tướng ồng Lê Văn Thành đơs sùm bàr tơngai lơh broă mờr tus là lơh ngan tơmŭt bal tàm gùng che đèng Mpồl măy sồ dùl tàm ngai 30/04/2022 mờ chu chah dơ̆ sơnrờp mpồl măy sồ 1 tàm ngai 16/06/2022. Tus tŭ do, broă lơh rơndăp broă lơh neh lơh geh 88,75%, tàm hơ̆ broă lơh rơndăp lơh lơh geh mờr 100%; blơi prăp phan geh mờr 96%; lơh bơ̆t bơtàu crăp ơn geh mờr 88%; pờ tơrlòng geh mờr 26%.

Kwơmàng là, Mpồl cau tờm lơh pờ tơrlòng kung gam tơrgùm cau lơh broă tàm dơ̆ sa tềp mờ neh pơn jăt tai tơnguh tai tơnơ̆ dơ̆ ơm rlô nàng gàr niam broă lơh. Kơnờm bè hơ̆, rơndăp broă lơh neh lơh geh broă “Chu ồs dơ̆ sơnrờp mờ zờu” tàm ngai 23/02 ai mpồl măy sồ 1 in. Do là tŭ tơngai kwơmàng wèt tus lơh gơs ală tŭ tơngai mŭt bal jơh dùl ròt tàm ngai 19/05 tus mờ chu ồs mờ chah tàm ngai 16/06/2022.

  Cau mblàng Lơ Mu K’Yến