VOV4.K’ho- Mho ngai 11/02, Phó Thủ tướng ồng Lê Văn Thành neh pơrjum mờ ală ƀộ, gah sơnah lơh broă dà lơgar mờ càr, ƀòn dờng bè broă rơcăng bơcri priă lơh ală rơndăp broă lơh gùng rơndeh ù gờl ntoăt răt sơnđờm lơh pa tàm tơngai bơh nam 2021- 2025.

Jăt jơnau yal bơh Ƀộ Giao thông Vận tải dê, tàm 05 rơndăp broă lơh kwơmàng dà lơgar dê geh 03 rơndăp broă lơh bơh Ƀộ Giao thông Vận tải drơng lơh, tàm hơ̆ geh: Gùng rơndeh ntoăt răt Biên Hoà- Vũng Tàu; Gùng rơndeh ntoăt răt Châu Đốc- Cần Thơ- Sóc Trăng mờ Gùng rơndeh ntoăt răt Khánh Hoà- Buôn Ma Thuột mờ 02 rơndăp broă lơh bơh càr, ƀòn dờng dê drơng lơh, tàm hơ̆ geh: Rơndăp broă lơh Gùng pleh 4 tiah càr lơgar Hà Nội mờ Rơndăp broă lơh gùng pleh 3 ƀòn dờng Hồ Chí Minh bal mờ 4 rơndăp broă lơh mpồl A.

Pơndŭt dơ̆ pơrjum, Phó Thủ tướng ồng Lê Văn Thành đơs loh, bơtàu tơnguh gùng rơndeh ntoăt răt geh lơh gơlik geh bơta gơn kơnờm pa ai bơtàu tơnguh lơh sa- mpồl bơtiàn in bơh jơh ală càr, ƀòn dờng geh gùng rơndeh ntoăt răt lòt gan. Dilah lơh gờñ, ngan là tàm broă sờr ntrờñ ù tiah hìu đam geh gơmù priă tă lơh uă ngan. Phó Thủ tướng pà gĭt, Cíñ phủ, Quôk hội, ngan là Ƀộ Cíñ trị neh geh jơnau đơs pơndŭt bơh tŭ do tus nam 2025 ai lài priă jền nàng bơtàu tơnguh gùng rơndeh ntoăt răt.

Cau mblàng Lơ Mu K’Yến