VOV4.K’ho- Ngai 06/04, tàm Hìu duh broă Cíñ phủ, Phó Thủ tướng ồng Lê Văn Thành pơrjum pờ tơn tàm internet Mpồl đơng lam dà lơgar Rơndăp broă lơh Ƀlàng rơndeh par dunia Long Thành. Jăt jơnau yal bơh cau tờm bơcri priă dê, tơnơ̆ tŭ lơh sir jơh broă lơh sac rwah cau lơh mờ kĭ sră hơ pơrgon ngai 16/03/2022, Tổng Kông ty Ƀlàng rơndeh par Việt Nam (ACV) neh lam lơh sơnđờm lơh ală broă jrong, bơnàng hìu ơm năc đìh rơndeh par in.

Tơnơ̆ rlau dùl nhai lơh, broă lơh cò pơnring bơnàng ù neh lơh sir jơh ală anih khuàng sơntơ̆p tơrlòng lài jrong, tus jơh nhai 3 lơh geh 2,5 tơlak bơnah tờ bơ̆t sơrlèt 500 rbô khối pơndrờm mờ broă rơndăp lơh. Bè priă jền, tus tŭ do Tổng Kông ty Ƀlàng rơndeh par Việt Nam neh rơcăng tơl tă pơgồp 36 rbô tơmàn đong  rơcăng ai rơndăp broă lơh in. Tàm dơ̆ pơrjum, ală kwang bàng đơs là, tŭ tơngai ai ù, jàu măt ù ai rơndăp broă lơh in tàm tơngai do geh uă bơta tam gơl, mơya kung gam lơyài sơl pơndrờm mờ broă rơndăp lơh den tàng neh lơh gơbàn kal ke tàm tŭ lơh. Phó Thủ tướng ồng Lê Văn Thành đơs sùm jơnau kờñ: pal lơh tus geh, sơnđờm ai ngui rơndăp broă lơh tàm nam 2025; bơta niam pal ơn lài khà dùl mờ pal lòt bal mờ ală broă bơsong sùm, sùm sùm kơryan pơhì pơhà, hoàc hươr, ờ niam tàm rơndăp broă lơh.

Cau mblàng Lơ Mu K’Yến