VOV4.K’ho- Dờp jơnau jà bơh Phó Thủ tướng Cíñ phủ ồng Lê Văn Thành dê, Phó Củ tịc đơng pơlam Ủy ƀan câu Âu ồng Frans Timmermans neh geh dơ̆ lòt còp lơgar Việt Nam bơh ngai 17 tus ngai 19/02/2022.

         Phó Thủ tướng ồng Lê Văn Thành tìp mat cribơyai broă mờ Phó Củ tịc đơng pơlam Ủy ƀan câu Âu

Drim ngai 18/02, tàm dơ̆ tìp mat cribơyai broă đah Phó Thủ tướng Cíñ phủ ồng Lê Văn Thành mờ Phó Củ tịc Frans Timmermans, 2 gah neh ai tơnggŏ bơta chờ hờp sền gŏ tàm tơngai lài, bulah kong gơ rềng bơh kòp Kovid-19, git gơp đah Việt Nam mờ Mpồl tam klac câu Âu pơn jat tai bơtàu tơnguh niam. Mpồl tam klac câu Âu tŭ do là mpồl lơh broă bal lơh sa- bơtàu tơnguh kuơmàng bơh Việt Nam dê, kuơmàng gam là mpồl dong kờl ờ tơm wơl dờng ngan rlau jơh, drà kă bro tac phan hờ lơgar ndai dờng dơ̆ 3, drà kă bro blơi phan bơh lơgar ndai dờng dơ̆ 5 mờ cau bơcri priă dờng dơ̆ 6 bơh Việt Nam dê. Priă geh bơh kă bro đah 2 gah Việt Nam mờ Mpồl tam klac câu Âu lơh geh cồng nha niam, geh 57 tơmàn dolar Mỹ tơnơ̆ 18 nhai lơh jat Hiệp địñ kă bro khat gơboh (EVFTA). 2 gah ring bal pơn at tai chồl pràn lam lơh ngan ngồn, geh cồng nha lơh broă bal tàm ală gah cíñ trị- lơh broă mờ lơgar ndai, kă bro bơcri priă, lơh broă bal bơtàu tơnguh, lơh sa suơn sre, tiah ơm kis, năng lượng, sền gàr lơngap lơngai, sền gàr dà lơgar.

Cau mblàng K’Duẩn