VOV4.K’ho- Drim ngai 23/5, tàm dơ̆ mut pơrjum dơ̆ 3, Quôk hội khóa 15, dờp gơnoar jàu bơh Thủ tướng Cíñ phủ dê, Phó Thủ tướng Cíñ phủ ồng Lê Văn Thành yal Jơnau yal sền sơwì, bơ tơl cồng nha lam lơh broă rơndap lơh bơtàu tơnguh lơh sa- mpồl bơtiàn mờ kes priă dà lơgar nam 2021; broă lơh jat broă rơndap lơh bơtàu tơnguh lơh sa- mpồl bơtiàn mờ kes priă dà lơgar ală nhai bồ nam 2022.

Tàm kơnòl broă tơngai tus, Cíñ phủ tơrgùm tàm 12 mpồl broă lơh tờm ngan, tàm hơ̆ sền gròi uă tus broă tơrgùm sền gròi kòp Kovid-19 mờ bơtàu tơnguh mhar, bơtàu tơnguh lơh sa mpồl bơtiàn kơ̆ kơljap. Mhar lam lơh jat ală Nghị quyết bơh Pơrjum Đảng dà lơgar dơ̆ 5 khóa 13 dê, ngan là broă ù tiah, lơh sa mpồl bal, hợp tak xã, lơh sa suơn sre, cau lơh broă sa mờ ƀòn lơgar; mhar lơh sir, yal Quôk hội sền sơ wì tam gơl Adat ù tiah nam 2013.

Cau mblàng K’Duẩn