VOV4.K’ho - Mho òr (23/08), tàm hìu lơh broă Cíñ phủ, Mpồl duh broă Pơlam broă toh glài tơnklàs jàm pơrjum sền sơwì khà măt cau nàng dan Củ tịc lơgar toh glài tơnklàs jàm lài mờ tơngai ai cau jàm geh tơl bơta niam nàng toh glài tơnklàs jàm dơ̆ ngai 2 nhai 9 nam 2022.

Phó Thủ tướng Thường trực Cíñ phủ ồng Phạm Bình Minh, Củ tịc Mpồl duh broă pơlam toh glài tơnklàs jàm nam 2022 đơng lam pơrjum. Nàng broă sền sơwì khà măt cau geh lơh nền nòn, lơh tờm, loh làng, ndrờm bal, Mpồl duh broă pơlam pal sền nền tus tơl nă cau geh toh glài tơnklàs jàm mờ broă lơh nền nòn di jăt mờ kơrnoăt tàm adăt toh glài tơnklàs jàm geh ai. Đơs tàm dơ̆ pơrjum, Phó Thủ tướng ồng Phạm Bình Minh pà git, Toh glài tơnklàs jàm là broă lơh niam bơnĕ ngan bơh Đảng, Dà lơgar dê; den tàng ală kấp, ală gah lơh broă pal sền gròi tus mờ broă tơrgùm wơl tai mờ mpồl bơtiàn ai cau geh toh glài tơnklàs jàm in rê mờ ƀòn lơgar. Mờ tơrgùm chồl pràn broă lam sồr tus bal dong kờl cau geh toh glài tơnklàs jàm sơbì bơta ƀàs sìl tìs glài.

Cau mblàng Ndong Brawl