Lơh jat jơnau sồr bơh Thủ tướng Cíñ phủ dê, ngai 07/04, tàm càr Tiền Giang, Phó Thủ tướng Cíñ phủ ồng Trần Hồng Hà bal mờ ồng Lê Minh Hoan- Ƀộ trưởng Ƀộ Nông nghiệp mờ Phát triển Nông thôn, ồng Đặng Quốc Khánh-Ƀộ trưởng Ƀộ Tài Nguyên mờ Môi trường đơng lam dơ̆ pơrjum pờ tơlik tơn tàm internet mờ ală tiah tàm tiah ring dà dờng Cửu Long, geh ală càr: Tiền Giang, Bến Tre, Sóc Trăng, Cà Mau, Kiên Giang, Bạc Liêu, Long An bè broă lơh do.

Kàl prang nam do, tài bơh dà dờng Mekong gơmù soăt 7% pơndrờm kờp bal mờ ală nam lài tàm tiah ring dà dờng Cửu Long kong gơrềng bơh dà hang mut aniai gờñ, jrô rlau kờp bal mờ uă nam, mìu tus jơla rlau; kwơ màng geh 3 dơ̆ trồ pang dờng dà hang mut aniai uă ngan gơlik geh tus bồ nhai 05. Đơs tàm dơ̆ lơh broă mờ mpồl lơh broă bơh Cíñ phủ, kwang đơng lam bồ ală càr dan mờ Bộ, ngàñ Dà lơgar mờ Cíñ phủ dong kờl lơh sir ală broă lơh bơtơ̆t rbòng dà nàng lơh kơryan kơ̆, tơnau dà drơng dà ngui sa, ală broă lơh drơng dà sàng goh tơrgùm tàm ală tiah jat kềng gah dà lềng, bơsong bơta ñchùn ù, tơrlah ù... Đơs pơndŭt dơ̆ lơh broă, Phó Thủ tướng ồng Trần Hồng Hà tơngkah ală càr tàm tiah ring dà dờng Cửu Long pal bơsram geh ală jơnau bơsram mờng chài lơh broă tàm broă lơh rcang lài kơryan trồ prang dờng dà hang mut aniai, lơh kơ̆ ală bơtơ̆t rbòng dà.