Mho ngai 03/03, kung tàm dơ̆ tus bal Pơrjum Ƀộ trưởng bè Mpồl bơtiàn bơtàu tơnguh ờ tuh sang phan ƀơ̆ tàm tiah ơm kis câu Á geh bơyai lơh tàm Tokyo, lơgar Nhờk, Phó Thủ tướng Cíñ phủ ồng Trần Hồng Hà neh tìp mat mờ Củ tịc Hạ viện lơgar Nhờk ồng Hosoda Hiroyuki, tìp mat Củ tịc Mpồl tam klăc gĭt gơ̆p lơh bơyô đah Nhờk mờ Việt Nam ồng Nikai Toshihiro mờ wă Ƀộ trưởng Lơh sa, Kă bro mờ Lơh sa mờ măi mok ồng Nishimura Yasutoshi mờ bàr pe nă Nghị sĩ Đảng Dân chủ Tự do tàm gah tiah ơm kis.

Tàm dơ̆ tìp mat mờ Củ tịc Hạ viện, Phó Thủ tướng ồng Trần Hồng Hà jờng rơ uă ngan bơta bơtàu tơnguh niam bơnĕ tàm ală gah bơh bơta gĭt gơ̆p Lơh broă bal jŏ jòng jrô ơnàng Việt Nam mờ Nhờk; sồr Củ tịc Hạ viện kờñ broă sơlơ tơnguh tìp mat kwang bàng kấp dờng mờ ală kấp đah Cíñ phủ, Quôk hội, ală Nghị sỹ kơnòm să 2 lơgar dê; Cíñ phủ Nhờk sơlơ dong kờl Việt Nam tàm broă bơtàu tơnguh phan bơna kwơ màng, bơtàu tơnguh cau lơh broă, tam gơl năng lượng pa kung bè sơlơ tơnguh lơh broă bal tàm gah kơlôi sơnơng, tàm jàu kông nghệ mờ pơgồp bơnah tàm broă bơtàu tơnguh kơ̆ kơljap.