Thứ trưởng Ƀộ Y tế ồng Đỗ Xuân Tuyên pà git, broă lơh rơndap tap sèng wơl hìu sơnơm gơ wèt Ƀộ Y tế jat gùng dà tơrmù mpồl atbồ tơn, gàr niam lam lơh di jơnau sồr, jơnau lơh nền bơh Đảng, adat boh lam bơh dà lơgar dê, dipal mờ rơndap ù tiah ală hìu sơnơm dà lơgar mờ bơta geh ngan. 

Đơs pơn dut dơ̆ pơrjum, Phó Thủ tướng ồng Trần Hồng Hà đơs nền: broă rơndap tap sèng wơl ală hìu sơnơm gơ wèt Ƀộ Y tế, kung bè ală ƀộ, gah broă lơh nàng kờñ lam lơh bơcri priă, lơh ală hìu sơnơm geh tơl bơta nàng lam lơh jơnau kờñ tơnguh bơta niam kham, sơm kòp ai làng bol in. Phó Thủ tướng ồng Trần Hồng Hà sồr Ƀộ Y tế kờp sền, rơndap tap sèng wơl ală hìu sơnơm gơ wèt Ƀộ Y tế jat jơnau sồr tŭ do, mờ kung sền gròi tă priă lơh ală hìu sơnơm cuyên khoa, lơh broă tàm ală tiah kal ke, tiah sar lơgar ngài mơya ờ hềt tơl khà jat jơnau sồr bơh hìu sơnơm gah ờs mờng dê.