Đơs niam nùs nhơm pin dờn, bơta pràn bơh Tập đoàn Ô tô Geely Auto lơgar Lo dê mờ rơlao 50 lơgar tàm dunia, Phó Thủ tướng kơ̆p kờñ rơndăp broă lơh broă bal bơcri priă bơh Tập đoàn tàm lơgar Việt Nam rơ̆p geh cồng nha niam.

Cri bơyai bè ờ uă nùs nhơm kwơ màng tàm broă dong kờl bơtàu tơnguh phan bơna gùng lòt tàm lơgar Việt Nam, Phó Thủ tướng kơ̆p kờñ rơndăp broă lơh broă bal bơcri priă bơh Geely Auto tàm lơgar Việt Nam pal geh lơh mhar, tơl ală bơta bơh broă kơlôi sơnơng, lơh, bơtàu tơnguh, tam jào phan lơh broă, bơto cau lơh broă; mờ sền gròi tus rài kis phan bơna, nùs nhơm, bơto bơtê, lơh sơnơm ai cau lơh broă in.