Phó Thủ tướng ồng Trần Hồng Hà đơs nền, Cíñ phủ mờ làng bol Việt Nam jờng rơ gơnoar broă bơh Mpồl lơh sơnơm dunia (WHO) dê tàm ală broă lơh pơlam, tàm tơrbŏ bal gùt plai ù bè gah lơh sơnơm, sền gàr pràn kơldang să jan làng bol. Tàm tơl gah broă, broă lơh bè lơh sơnơm, sền gàr pràn kơldang să jan tàm lơgar Việt Nam ndrờm geh bơta lòt bal, tus bal, pơlam, dong kờl bơh kwang atbồ, cau jak chài WHO. 

Kuơmàng, tàm tơngai gơlik geh kòp dờng Kovid-19, Việt Nam neh dờp geh bơta dong kờl sơrbac mhar, di tŭ, geh cồng nha bơh WHO nàng sơrlèt gan mờ kơryan gơtùi kòp dờng. Là 1 tàm 5 lơgar geh WHO rơ wah nàng tàm jàu măi mok mok lơh gơlik sơnơm mNRA, Việt Nam kơp kờñ dờp geh bơta dong kờl ngan ngồn nàng tơnguh pràn jak kơlôi sơnơng, lơh gơlik sơnơm vaccine, ờ mìng rơcang lài kơryan kòp pa gơlik geh mờ jơh bal 2, 3 bơta kòp bơtờp gam pơhìn gơbàn uă wơl bè sởi, kòp jòr bơsiă gơlik mhàm.