Mho ngai 07/08, tàm Hà Nội, Phó Thủ tướng ồng Trần Lưu Quang, Kwang ătbồ Ủy ƀan Dà lơgar rơcăng lài tam dră wơl mờ jơnau gơ aniai mờ lòt jòi dong kờl rềs àr gơ aniai đơng lam pơrjum lam lơh jăt kơnòl broă tờm tàm ală nhai lồi nam 2023. Bơh mờr 8 nhai do, jơh gùt lơgar gŏ 1 rbô 753 jơnau gơ aniai, trồ tiah lơh aniai lơh chơ̆t mờ sồt să 450 nă cau; 1 rbô 176 rbô lồ brê gơtìp ồs sa; tơrlah tơrlơm, gơ pồ rơkàng rlau 9 rbô nơm hìu; lơh aniai hoàc hươr rlau 45 rbô lồ kòi mờ phan tam...

Rơcăng lài tam dră wơl mờ bơsong jơnau gơ aniai, trồ tiah lơh aniai, neh hòi tơrgùm rlau 53 rbô nă cau mờ 3 rbô 633 nơm rơndeh rơndồ ală bơta. Đơs nền tàm dơ̆ pơrjum pà gŏ, bulah broă lơh mblàng yal geh sền gròi, mơya bơta gĭt wă bơh ờ dùl êt gơnoar ătbồ ƀòn lơgar, ƀòn lơgar mờ làng bol dê gam ờ hềt rơcăng ngăc; hoàc hươr tài bơh jơnau aniai, trồ tiah lơh aniai gam uă, ngan là hoàc hươr bè màng kis làng bol dê tŭ gơlik geh jơnau gơ aniai, mìu dà tih, dà cò, tơrlah ù...

Đơs pơndŭt dơ̆ pơrjum do, Phó Thủ tướng ồng Trần Lưu Quang dùl nùs bal mờ 12 kơnòl broă tờm neh yal. Phó Thủ tướng đơs loh: trồ tiah lơh aniai bơh tŭ do tus lồi nam gam kal ke ngan gơtùi gĭt lài, rơcăng lài tam dră wơl mờ trồ tiah lơh aniai pal rơcăng ngăc rlau tai, ală Ƀộ, gah lơh broă dà lơgar mờ ƀòn lơgar pal kờp sền wơl ală kơnòl broă he dê nàng kờñ bơtơl dipal mờ jơnau sồr ngan ngồn tàm broă rơcăng lài tam dră wơl mờ trồ tiah lơh aniai.