Dờp jơnau jà bơh Cíñ phủ lơgar Cuba dê, Phó Thủ tướng ồng Trần Lưu Quang sơnđờm lòt còp lơh bơyô ngan ngồn lơgar Cuba bơh ngai 14 tus ngai 19 nhai 04. Mho ngai 15/04, Phó Thủ tướng ồng Trần Lưu Quang neh geh dơ̆ tìp mat cribơyai mờ Phó Thủ tướng dơ̆ 1 mờ kung la Ƀộ trưởng Ngoại thương mờ Bơcri priă lơgar ndai lơgar Cuba ồng Ricardo Cabrisas.

Ala mat Cíñ phủ mờ làng bol lơgar Việt Nam, Phó Thủ tướng ồng Trần Lưu Quang tơngŏ bơta ưn ngài uă ngan bơta dong kờl geh nùs nhơm oh mi bơh Kwang đơng lam bồ ồng Fidel Castro dê, ală rơnàng kwang đơng lam bồ mờ làng bol lơgar Cuba lời ai lơgar Việt Nam in tàm broă lơh tơngklàs jơi bơtiàn, bơt bơtàu mờ sền gàr Dà lơgar. Phó Thủ tướng đơs nền Cíñ phủ lơgar Việt Nam jơh nùs lơh ngan lam lơh ală rơndăp broă lơh dong kờl lơgar Cuba sơlơ tơnguh lơh sa suơn sre tàm nùs nhơm Kwang bàng lơh broă bal, oh mi bal, cồng nha mờ geh ngan. Mơkung đơs sùm bơta kwơ màng bơh mpồl lơh sa kă bro mờ làng bol 2 lơgar dê tàm broă lam lơh, ngui niam geh cồng nha ală rơndăp broă lơh lơh broă bal đah 2 gah; sồr Cíñ phủ lơgar Cuba sền gròi dong kờl; lơh geh ală bơta nàng mpồl lơh sa kă bro lơgar Việt Nam bơcri priă geh cồng nha tàm lơgar Cuba. Bàr nă Phó Thủ tướng ring bal pơn jat tai pơgồp bal niam tàm broă lam lơh ală jơnau ring bal kwang bàng kấp dờng neh lơh geh, ngui niam geh cồng nha rlau tai broă lơh Ủy ƀan 2 Cíñ phủ nàng kờñ sơlơ tơnguh ală rơndăp broă lơh lơh broă tờm, jòi gùng dà broă lơh dong kờl mpồl lơh sa kă bro lơgar Việt Nam kă bro, bơcri priă tàm lơgar Cuba, tă pơgồp tàm bơta gĭt gơ̆p đah 2 gah dê.