Pơrjum neh yal Jơnau lơh nền tàm pơrjum bơh Thủ tướng Cíñ phủ dê ring bal rơndăp ù tiah Tây Nguyên tơngai bơh nam 2021- 2030, rơndăp broă tus nam 2050. Jat hơ̆, tơngai bơh nam 2021-2030 tiah Tây Nguyên ai jơnau kờñ lơh pràn gơguh lơh sa kờp jơh phan bơna kờp bal lơh geh bơh 7 tus 7,5%; priă lơh geh kờp bal tơl nă cau pơgăp 130 tơlak đong.

Pơrjum kung neh sền wơl rlau 1 nam lơh jat Nghị quyết sồ 23 bơh Ƀộ Cíñ trị dê mờ broă lơh lơh broă bơh Cíñ phủ dê bè bơtàu tơnguh lơh sa, mpồl bơtiàn, gàr niam sền gàr Dà lơgar, lơngăp lơngai tiah Tây Nguyên. Đơs pơndŭt pơrjum, Phó Thủ tướng Cíñ phủ ồng Trần Lưu Quang đơs là, tơngai pa do, lơh sa, mpồl bơtiàn tiah Tây Nguyên neh geh ală broă lơh tam gơl niam. Ală càr geh bơta pràn bơtàu tơnguh mhar tàm tơngai tus mờ 3 broă lơh digơlan geh lơh tơn. Hơ̆ là gùng lòt tàm tơrbŏ bal. Dơ̆ 2 là bơtàu tơnguh broă lơh lòt nhơl jat anih lơh bal, jat dơ̆ lòt nhơl mơya tơngkah tơl tiah lòt nhơl pal geh bơta niam krơi is ngan. Dơ̆ 3 là digơlan tam pà bal tàm broă gơ hòi gơ jà bơcri priă tàm lơgar mờ lơgar ndai.