Đơs tàm dơ̆ pơrjum, Kwang atbồ dờng Anih jơnau đơs Việt Nam ồng Đỗ Tiến Sỹ đơs loh, tàm tŭ bơtàu tơnguh VOV, là anih lơh broă mblàng yal jơnau tờm ngan bơh Dà lơgar dê, mờ 7 gah pờ tơlik jơnau đơs, 17 gah sơñio rùp, Ƀăo pơ àr mờ Ƀăo Điện tử, Anih jơnau đơs Việt Nam là anih mblàng yal jơnau uă gah mờ uă sră ƀăo tàm bơnàng jă sồ dê.

Tàm pơrjum, Phó Thủ tướng Cíñ phủ ồng Trần Lưu Quang đơs loh, tơngkah kir sơnrai 99 nam Ngai sră ƀăo kăc màng Việt Nam là broă lơh kwơ màng ngan bơh mpồl ală cau lơh ƀăo dê, den tàng pal geh kơnòl bơt bơtàu mờ bơtàu tơnguh rài sră ƀăo kăc màng. Jat rơndăp ù tiah Sră ƀăo, sră ƀăo gam tàm tơngai tam gơl, kờñ geh broă lơh pal kơlôi sơnơng nền nòn ngan. Bơdìh mờ kơnòl broă bơh đah Cíñ phủ dê, ală anih lơh ƀăo pal sơr lèt gan kal ke. Gờm chờ ală anih lơh ƀăo mblàng yal jơnau sùm tàm nùs nhơm niam, bồ tơngoh sàng goh, geh bềng bơta pràn nàng cơn đòa lòt tai gơl gùng gam geh uă bơta kal ke đah đap dê.