VOV4.K’ho - “Ală Ƀộ, anih lơh broă dà lơgar pal geh broă lơh pràn nàng chồl pràn broă bơcri priă dà lơgar, lơh ngan tơmù bơta geh ờ uă rơndăp broă lơh ờ hềt geh rơcang lài nền nòn sră nggal tŭ ai rơndăp broă bơcri priă dà lơgar”.

Do là jơnau sồr bơh Phó Thủ tướng ồng Vũ Đức Đam, Kwang atbồ mpồl lơh broă sồ 3 tàm pơrjum bè broă sền, lam sồr, bơsong kal ke, chồl pràn broă bơcri priă dà lơgar nam 2022 tŭ lơh broă mờ ală ƀộ, gah lơh broă, anih lơh broă dà lơgar geh bơyai lơh ngai òr (17/05) tàm Hà Nội. Jăt jơnau yal bơh Ƀộ Kế hoạc mờ Đầu tư, Kờp tơrgùm jơh rơndăp broă bơcri priă dà lơgar nam 2022 geh jào ală ƀộ, anih lơh broă dà lơgar gơwèt mpồl lơh broă sồ 3 là 12 rơbô 19 tơmàn đong.

Kờp tus jơh nhai 5, ală Ƀộ, anih lơh broă dà lơgar kờp dŭ bơcri priă geh di pơgăp 464 tơmàn đong, geh 3,86% khà rơndăp broă nam 2022, ờ uă rơlao mờ khà bè ờs bal gùt lơgar là 20,27%, tàm hơ̆ 13 mpồl lơh broă kờp dŭ bơcri ờ uă ngan hờ đơm 10%. Kwang đơng lam ală Ƀộ, anih lơh broă dà lơgar đơs là: nàng chồl pràn broă bơcri priă dà lơgar, pal pơn jăt tai sền wơl, lơh gơs ală kơ cế, broă lơh adăt boh lam bè broă bơcri priă dà lơgar, ù tiah, bơ̆t bơtàu mờ adăt boh lam geh gơrềng jăt broă tam pà kấp, lơh niam sră nggal bè bơcri priă, tă priă nàng di tŭ bơsong kal ke, chồl pràn broă bơcri priă dà lơgar.

Cau mblàng Ndong Brawl