VOV4.K’ho- Mho ngai 25/7, tàm Hìu lơh broă Cíñ phủ, Phó Thủ tướng ồng Vũ Đức Đam, Kwang atbồ mpồl lơh broă sồ 3 bè sền sơ wì, chul chồl tă bơsong kal ke, tơnguh mhar broă tă priă bơcri dà lơgar nam 2022 neh lơh broă mờ 17 ƀộ, anih lơh broă dà lơgar, 2 càr Cao Bằng mờ Bắc Kạn bè tơngai lam lơh broă tă priă bơcri dà lơgar. Kờp tus ngai 30/5, khà tă priă bơcri bơh 17 ƀộ, gah broă lơh gơ wèt Mpồl lơh broă sồ 3 dê geh mờr 1 rbô 585 tơmàn đông, geh 8,77% broă rơndap lơh mờ lơyah rlau khà kờp bal bơh gùt lơgar dê. Kờp tus ngai 22/7, càr Cao Bằng tă geh rlau 20%, càr Bắc Kạn tă geh rlau 22%.

Jơnau lơh gơ rềng tus tơngai tă priă bơcri dà lơgar là tài bơh tam gơl mpồl lơh broă, broă lơh bè lam lơh jat sră pơrgon bơt bơtàu, rơndap broă lơh ODA; bơta tam gơl bè khà priă phan bơt bơtàu, cau lơh broă bơt bơtàu... Đơs pơn dut dơ̆ pơrjum, Phó Thủ tướng ồng Vũ Đức Đam sồr pơn jat tai tơnguh broă tă priă bơcri dà lơgar, kờp dŭ geh lơh geh tơngai hơ pơrgon ai tơlik tàm lồi nam; nùs nhơm là geh priă den pal tă gơtùi. Mờ ală rơndap broă lơh ờ hềt lơh gơs sră nggal den ờ hềt tơm, bal mờ hơ̆ tàm tŭ tơm wơl den ală cau tờm bơcri priă, ală anih lơh broă kung gam pal pơn jat tai lam lơh, tŭ tơl sră nggal den geh ai pà wơl.

Cau mblàng K’Duẩn