VOV4.K’ho- Drim ngai 21/9, tàm Hìu lơh broă Cíñ phủ, Phó Thủ tướng Cíñ phủ ồng Vũ Đức Đam lơh broă mờ Ƀộ Y tế, ală mpồl tam klac, mpồl lơh sa kă bro tàm lơgar, lơgar ndai bè lam lơh broă rơndap lơh bơtàu tơnguh lơh sa mờ măi mok sơnơm tơmba tàm lơgar.

Tam gơl pa broă lơh kơlôi sơnơng lơh sơnơm

Ală kwang bàng sồr “Cíñ phủ gờñ yal tam gơl adat lơh sơnơm jat broă rơndap lơh tơrmù lơyah tàm nam 2023 geh gơtùi bơsong kal ke bè tơn jŏ tơngai sơnơm, atbồ khà priă sơnơm”. Jat jơnau yal bơh Kụk atbồ sơnơm tơmba dê, khà gơguh kờp bal bơh gah lơh sa mờ măi mok sơnơm tơmba tŭ do dê tàm pơgap bơh 10 tus 12%. Lơh sơnơm tàm lơgar geh 46% kờp jơh bơta kuơ sơnơm sơm kòp. Ală hìu măi ờ hềt gròi sền tàm broă kơlôi sơnơng lơh gơlik sơnơm kông nghệ kao, sơnơm pa, sơnơm cuyên khoa mờng sơm kòp…

 Jat ală kwang bàng đơs, tơngai lài, broă lơh atbồ khà priă sơnơm, tơlik lài gùng dà ngui sơnơm neh kơryan broă tàm jàu kông nghệ lơh sơnơm pa. Broă lơh bơcri priă ai kơlôi sơnơng mờ bơtàu tơnguh in gam ờ uă. Ală jơnau đơs sồr ală gah lơh sa mờ măi mok sơnơm tơmba pal tơrgùm gơ hòi gơ jà bơcri priă tàm kông nghệ lơh gơlik mờ tơnguh bơta niam phan lơh gơs; lơh gơs phan nàng lơh sơnơm; lơh ală anih tờm kơlôi sơnơng sơnơm vaccine, bơtàu tơnguh phan lơh sơnơm tàm lơgar; tơnguh pràn jak kơlôi sơnơng, sền sơ wì sơnơm tơmba.

Cau mblàng K’Duẩn