VOV4.K’ho- Drim ngai 05/9, gơ rờm bal mờ nùs nhơm chờ hờp, bềng lìu bơkàu mờ bồng bi bơh Ngai chờ jơh gùt làng bol jun kơnòm dềt tus hìu bơsram dê, cau pơgru mờ kơnòm bơsram Hìu bơsram kâp 1 Trung Tự (quận Đống Đa, ƀòn dờng Hà Nội) pơn iờ să ngan wă Phó Thủ tướng Cíñ phủ ồng Vũ Đức Đam tus bal dơ̆ bơyai lơh sơn đờm mut nam bơsram pa 2022- 2023.

Phó Thủ tướng Vũ Đức Đam tus bal Dơ̆ bơyai lơh sơn đờm mut nam bơsram pa tàm hìu bơsram kâp 1 Trung Tự, ƀòn dờng Hà Nội

Hìu bơsram kâp 1 Trung Tự tŭ do geh rlau 1 rbô 700 nă kơnòm bơsram mờ 38 ơdŭ bơsram, tàm hơ̆ geh 1 ơdŭ gơ rờm bal lời ai 2, 3 nă oh kuet kơlte, lơyài git wă, geh tềl tơnggŏ tự kỷ... Tơnơ̆ tŭ tus bal dơ̆ mut nam bơsram pa mờ lòt sền phan bơna bơh Hìu bơsram kâp 1 Trung Tự dê, Phó Thủ tướng ồng Vũ Đức Đam kơp kờñ, broă lơh bơto bơsram bơh Hìu bơsram kâp 1 Trung Tự dê gah lam lơh uă tàm ală hìu bơsram ndai; mờ kung sồr kwang đơng lam bồ quận Đống Đa pơn jat tai sền gròi, lơh gơlik bơta niam rlau tai nàng ală hìu bơsram tàm quận in pơn jat tai lam lơh bơto bơtê gơ rờm bal ai kơnòm dềt kuet kơlte in.

Cau mblàng K’Duẩn