VOV4.K’ho- Drim ngai 30/09, tàm Hà Nội, Mpồl tam klăc cau ùr dà lơgar Việt Nam bơyai lơh pơrjum sền wơl 2 Rơndap broă lơh bơh Cíñ phủ dê tơngai bơh nam 2017-2022, tàm hơ̆, geh: Rơndap broă lơh “Mblàng yal, bơto bơtê, hòi jà, dong kờl cau ùr tus bal bơsong bàr pe broă mpồl bơtiàn geh gơrềng tus cau ùr tơngai bơh nam 2017-2027” (Rơndap broă lơh sồ  938) mờ Rơndap broă lơh “Dong kờl cau ùr sơnđờm mŭt lơh broă tơngai bơh nam 2017-2025” (Rơndap broă lơh sồ 939). Phó Thủ tướng Cíñ phủ ồng Vũ Đức Đam mờ kwang đơng lam bồ ală Ƀộ, Ƀan, ngàñ dà lơgar tus bal.

Phó Thủ tướng ồng Vũ Đức Đam tus bal pơrjum sền wơl 2 Rơndap broă lơh bơh Cíñ phủ dê tơngai bơh nam 2017-2022

Tàm pơrjum, ala mat ală càr, ƀòn dờng neh đơs bơta mờng chài, broă lơh geh cồng nha tàm ală gah bơh 2 rơndap broă lơh neh geh lơh mờ rề ơnàng bè: broă lơh lơh sa sàng goh- ngui sa sàng goh, broă lơh  rcang sơndră lơh pờng hìu bơnhă; ală broă lơh sơnđờm mŭt lơh broă geh cồng nha cau ùr dê. Mơkung dan ală broă lơh nàng kờñ lam lơh 2 rơndap broă lơh  niam rlau tàm tơngai tus. Phó Thủ tướng ồng Vũ Đức Đam đơs là, tàm tŭ ngui kông nghệ nàng yal tơngĭt bơta gĭt wă tus mờ ală cau là cau ùr, ală kấp, mpồl kờñ pal sền gròi tus mpồl cau ùr kal ke, tàm tiah sar lơgar ngài, gàr niam cau ùr geh gĭt mờ tơngume mblàng yal.

VOV Tây Nguyên- Cau mblàng K’Hạnh