VOV4.K’ho - Drim òr (26/09), UɃÑZ càr Bình Dương bơyai lơh hòi jà bơcri priă dunia (Horasis), Mpồl lơh sa mờ măi mŏk lơgar Ấn Độ, sơn đờm pơrjum lơh broă bal lơh sa Ấn Độ Horasis nam 2022 mờ tơngu me “Nhăp ñhar Việt Nam-bơta sền sơnơng pa”.

                             Sơn đờm pơrjum lơh broă bal lơh sa Ấn Độ Horasis nam 2022

Tus bal geh Phó Thủ tướng ồng Vũ Đức Đam mờ kwang bàng đơng lam ală ƀộ, gah lơh broă dà lơgar. Bơh pơrjum cri bơyai mờ 6 dơ̆ lơh pơrjum bal mờ 26 dơ̆ cri bơyai, càr Bình Dương kơ̆p kờñ geh jòi gŏ ală broă lơh kwơ màng, pơgồp bal tàm broă tơnguh bơtàu lơh sa càr Bình Dương dê. Đơs tàm dơ̆ sơn đờm pơrjum, Phó Thủ tướng ồng Vũ Đức Đam đơs, tiah lơh sa geh priă bơcri bơh lơgar bơdìh là dùl bơnah kwơ màng bơh lơh sa dê, cồng nha bơh ală cau bơcri priă lơgar bơdìh kung là cồng nha bơh lơgar Việt Nam dê. Pơrjum cri bơyai geh bơyai lơh là dơ̆ nàng Cíñ phủ, mpồl lơh sa kă bro bơh bàr lơgar Việt Nam mờ Ấn Độ tam pà bal nùs nhơm kơlôi sơnơng, broă bơceh lơh, rơndăp broă lơh bal nàng tơnguh bơtàu bal.

Cau cih VOV.vn-Cau mblàng Ndong Brawl