VOV4.K’ho- Tàm dơ̆ lòt còp mờ lơh broă tàm lơgar Việt Nam, mho ngai 23/02, tàm hìu lơh broă Cíñ phủ, Phó Thủ tướng Thường trựk Cíñ phủ ồng Phạm Bình Minh neh wă Kwang ala mat bơh Kwang atbồ lơgar Mỹ dê ồng John Kerry. Tàm dơ̆ wă, Phó Thủ tướng Thường trựk Cíñ phủ ồng Phạm Bình Minh ai tơnggŏ bơta chờ hờp tềng đăp ală bơta tam gơl pa tàm git gơp lơh broă bal tơl làm Việt Nam mờ Mỹ tàm tơl gah broă lơh, tàm hơ̆ priă lơh geh bơh kă bro đah 2 lơgar tàm nam 2021 geh 111 tơmàn dolar Mỹ.

Phó Thủ tướng đơs niam mờ ưn ngài ală broă lơh ngan mờ tă pơgồp bơh să tờm ồng John Kerry dê tàm broă bè ờs wơl git gơp lơh broă bal mờ tơnguh git gơp Việt Nam mờ Mỹ tàm nđờ jơt nam do; bơh bơnàng jă gam geh tŭ do, sồr 2 lơgar pơn jat tai sơlơ lơh broă bal nàng kờñ tơnguh git gơp Việt Nam mờ Mỹ bơtàu tơnguh kơ̆ kơljap, jŏ jòng, ngan ngồn mờ geh cồng nha. Di dơ̆ do, Phó Thủ tướng kung ưn ngài Cíñ phủ Mỹ tus tŭ do neh dong Việt Nam in kờp jơh 29 tơlak 100 rbô ding sơnơm vaccine kòp Kovid-19; ai tơnggŏ bơta kơp kờñ Mỹ pơn jat tai dong kờl lài ai Việt Nam in tàm ală gah bè bơto bơtê mờ bơsram, lơh sơnơm, dong kờl cau mờ lơh sa sồ.

Cau mblàng K’Duẩn