Tàm tiah lơh broă, Phó Thủ tướng Trần Hồng Hà cih dờp bơta pơnđơl pràn lơh ngan, geh kơnòl broă, jơh nùs lơh ngan mờ ală cồng nha neh lơh geh bơh ală Ƀộ, ngàñ, anih lơh broă, cau tờm bơcri priă lơh, mpồl atbồ rơndăp broă lơh, cau mut lơh mờ mpồl kwang bàng, cau lơh phan, cau lơh broă tàm broă lam lơh ală rơndăp broă lơh dê.

Phó Thủ tướng sồr ală tiah, cau tờm bơcri priă, mpồl lơh broă, mpồl bơto pơlam jat sền... pơn jat tai lam lơh niam, geh cồng nha ală jơnau sồr bơh Thủ tướng Cíñ phủ dê mờ ală rơndăp broă lơh gùng rơndeh lòt mhar Diễn Châu- Bãi Vọt mờ gùng che ồs đèng 500 kV Quảng Trạch– Quỳnh Lưu lơh jat di tŭ tơngai, lơh geh bơta niam. Kờp dŭ tơnơ̆ tŭ lòt sền tiah lơh broă, Phó Thủ tướng rơ̆p đơng lam dơ̆ pơrjum mờ ală ƀộ, ngàñ, anih lơh broă, mpồl lơh broă, ală tiah geh gơrềng bè broă lam lơh 2 rơndăp broă lơh tờm ngan pa đơs do nàng pơn jat tai bơsong ală bơta kal ke, kòl yan mờ bơsong ală jơnau đơs, jơnau dan.